తెలంగాణ అవ్వ!

ఎగిలివారంగ లేసి
ఆకిట్ల అలుకు జల్లి
సుద్దతో బాగా ముగ్గులేసి
అరుగులను జాజుతో అద్ది అద్ది
ముద్దుగా తీనెలు వెట్టి వెట్టి
ల్యాగలను బర్లను మ్యాతకు ఇడిశి పెట్టి
బాయి కాడికి వోయి బిందెతో లీల్లు దెచ్చి
పిడకతో అగ్గిని అంటువెట్టి పొయ్యి మీద జరంత బువ్వ వండి
పొలం కాడికి వోయె పెనిమిటికి సద్ది కట్టి
పిల్లగాండ్లను బడికి పంపి
అడ్లను దంచి గైండ్ల ఎండుగులు ఎండబోసి
బుక్కుతుంటె కోళ్ళను అదిలించి
అట్ల వోయె రాజవ్వను మందలించి
గట్క దిని గొంత అంబలి దాగి
కలుపు కోతలకు వోయి పొద్దు గూకె దంక కట్టం జేశి
కాల్లీడ్సుకుంట ఇంటికి తిరిగి వచ్చే
ఓ అవ్వా! నువ్వెంత మంచిదానివే!