మార్చిలో వ్రాసిన కవిత

కోడి కూస్తోంది
సెలయేరు ప్రవహిస్తోంది
చిన్ని పక్షులు కిచకిచ మంటున్నాయి
సరస్సు తళతళా మెరుస్తోంది
పచ్చని మైదానం ఎండలో పడుకొని ఉంది.

చిన్నా పెద్దా అందరూ కలిసి
పొలంలో పనిచేస్తున్నారు
పశువులు పచ్చిక మేస్తున్నాయి
వంచిన వాటి తలలు పైకి లేవడం లేదు

ఓడిపోయిన సైన్యం లా
మంచు వెనక్కి పారిపోయింది
అది ఇప్పుడు కొండచరియపై
దాక్కొని ఉంది.

నాగలి పట్టిన రైతు
కూనిరాగాలు తీస్తున్నాడు                                                 
పర్వతాల్లో హర్షం వెల్లివిరిసింది.                                                             
నీటిబుగ్గల్లో జీవం తొణికిసలాడింది
చిన్నిమబ్బులు  తేలిపోతున్నాయి
నీలాకాశం విస్తరించింది
వాన వచ్చి వెలిసింది.

( William Wordsworth   ఆంగ్ల పద్యం   Lines written in March  కు  స్వేచ్చానువాదం.   )

పుష్ప మంజరి

నీరదమునై
నింగిలో ఒంటినై
సాగేను నేను శిఖరాలపై

చెరువు పక్కన
చెట్టు నీడన
గాలికి నర్తించు
హేమ కుసుమాల రాశిని చూశాను నేను ఆపై
పాలపుంతల మెరయు
తారామణిహారముల వోలె
కడలి అంచున
కనుచూపు మేర
కలిసి సాగినవి పూలు
కనుపించె చూపులో
తలలూపుతూ పదివేలు

ఆనందముతో
ఉద్గమించెను అలలు
కెరటాల తళుకుల
అధిగమించెను విరులు
వికసించె పుష్పమై
ఓ కవి స్వాంతము
వివరించలేను నాకు కలిగిన
యీ సుందర దృశ్య భాగ్యము

చింతాక్రాంతమున
పవ్వళించిన వేళ
ఏకాంత మదిలోన
ఉల్లాసమును రేప
నాదు డెందము ముదముతో నిండగా
అంతరంగమున మెరయు అవే కుసుమాలు.

(Wordsworth వ్రాసిన The 'Daffodils' కు అనువాదం )

వేకువ గీతి

ఇది వసంత కాలం
ఇది శుభోదయం
ఇది ఉషోదయం
ఏడు గంటల సమయం-
ఆకాశంలో భరద్వాజ పక్షి
సముద్రంలో నత్తగుల్ల
మంచు ముత్యాలతో కప్పబడి
కొండశిఖరం.
దేవుడు తన స్వర్గంలో -
ప్రపంచం పదిలంగా వుంది.

( Robert Brown వ్రాసిన The Pippa's song అనే చిన్న కవితకు తెలుగు అనువాదం.)