ఆకులో ఆకువైనావా !
పూవులో పూవువైనావా !
అడవిలోనే దాగినావా !
ఓ కవీ ! కృష్ణ శాస్త్రీ !
ఇరుల గుసగుస తెలుసు నీకూ
కనుల బాసలు తెలుసు నీకూ
పోయినావా అమరలోకం
నీవు ప్రవాసివై !
భావ కవితకు భావి యువతకు
దారి చూపిన దివ్వె నీవే
కొత్త పోకడ పద్యములతో
వ్రాసినది నీవే !
మూగవోయిన గొంతులోనూ
కోటిరాగాల్ పలికినావూ
తీయతేనియ బరువులెన్నో
పాట లోపల నింపుతూ !
అశ్రువొక్కటి జారవిడువని
మనిషి అంటూ ఉండబోవడు
నీదు విషాద గాథలన్ విని
గుండె నీరై కరుగగా !
మరుగు వెన్నెల దారులంబడి
తొలుత గంధర్వ లోకాలకు
వియోగ గీతివై వెళితివా
నీవు ఊర్వశికై !
( దేవులపల్లి కృష్ణశాస్త్రి జన్మదినం ( 1 నవంబర్ ) సందర్భంగా - )
Posts
0 వ్యాఖ్యలు:
Post a Comment